ច្បាប់ក្រមង៉ុយ ច្បាប់ល្បើកថ្មី

	ច្បាប់ល្បើកថ្មី
អ្នកព្រះភិរម្យ	ភាសាអ៊ូខ្ញុំ	បង្គំនឹកគុណ
ព្រះពុទ្ធព្រះធម៌	ព្រះសង្ឃជាមុន	គុណគាប់មហាធ្ងន់
	មាតាបិតា ។
ឧបជ្ឈាយ៍ជាធំ	កាលចាប់ដៃខ្ញុំ	ឱ្យធម៌កេសា
អនុសាវន	ព្រះកម្មវាចា	គុណធម៌អក្ខរា
	ទាំងសាមសិបបី ។
ខែចេត្រឆ្នាំច	ចត្វាសក័ក	កគិតកាព្យថ្មី
លើកច្បាប់ប្រដៅ	កូនចៅប្រុសស្រី	តូចក្តីធំក្តី
	ចូរស្តាប់គ្រប់គ្នា ។
ត្បិតមនុស្សឥឡូវ	យកខុសជាត្រូវ	យកឆ្កួតធ្វើជា
អំពើអាក្រក់	ឡិឡក់លីលា	ព្រហើនពានពារ
	អាងមាសអាងប្រាក់ ។
អាងព្រើលអាងប្រាជា្ញ	អាងកោងអាងកាច	អាងកាប់អាងចាក់
អាងជើងអាងដៃ	អាងវាយអាងធាក់	អាងគុកច្រវាក់
	អាងមាស៊ីនកាត់ក ។
អាងសុទ្ធតែខុស	កូនអើយចាំចុះ	អាងនោះមិនល្អ
អ្នកគិតឲ្យល្អិត	ដ្បិតស្រុកលោកក្រ	ប្រមាណដំណ
	តទៀតទៅមុខ ។
សាសនានៅឆ្ងាយ	លែងបានសប្បាយ	មានតែកើតទុក្ខ
កើតទាន់លោកកិយ	ឮតែទំនុក	ដំកែលអាពុក
	ចូរចាំគ្រប់គ្នា ។
អ្នកជឿពាក្យចាស់	ជឿចាំឲ្យច្បាស់	កុំធ្វើបំពា
អ្នកហ៊ានស្បែកដាច	អ្នកខ្លាចស្បែកជា	មនុស្សប៉ោបៀ
	កុំយកខ្លួនបៀត ។
ឃើញឫកគេល្អ	ទោះបីមានក្រ	យកគេជាញាតិ
គួររាប់អ្នកក្រៅ	ផៅអ្នកឯទៀត	រាប់រើសមាយាទ
	សុចរិតត្រឹមត្រូវ
រៀនបទរៀនបាទ	កុំកោងហួសខ្នាត	កុំភ្លាត់ហួសផ្លូវ
កុំភ្លើនហួសម៉ែ	កុំប្រែហួសឪ	ឃើញចាស់សក់ស្កូវ
	កុំសូវមើលងាយ ។
បន្ទន់អាត្មា	ខ្លាចមេខ្លាចបា	ខ្លាចតាខ្លាចយាយ
បំរើមហាក្សត្រ	ប្រយ័ត្នស្តេចទាយ	ពាក្យពិតទំនាយ
	រលាយកេរ្តិ៍ឈ្មោះ ។
ពាក្យស្តេចពាក្យគ្រូ	មានប្រៃមានជូរ	កម្រពីរោះ
ជួនទាយឲ្យទាប	ជួនទាយឲ្យខ្ពស់	ទាយឲ្យស័ក្តយស
	ទាយចុះកុំខឹង ។
បម្រើមើលភេទ	ចំណាំព្រះនេត	ហេតុខ្លួនឲ្យដឹង
ខ្លួនខ្ជិលហៃព្រើល	លោកមើលសំឡឹង	សំឡក់ឲ្យប្រឹង
	ខំប្រិតរៀនសូត្រ ។
បម្រើមើលពុត	ប្រាជ្ញាឲ្យមុត	ស្មារតីឲ្យមាន
បើខ្លៅឲ្យប្រាជ្ញ	បើខ្លាចឲ្យហ៊ាន	ចង់បានរបៀន
	កុំអៀនកុំខ្មាស់ ។
ពុតលោកជាធំ	ជ្រងោប៉ុនភ្នំ	ឯងមើលមិនច្បាស់
បម្រើលោកណា	លោកហ្នឹងជាម្ចាស់	លោកស្អប់អ្វីណាស់
	ប្រាសចោលឲ្យឆ្ងាយ ។
កុំឈមឈរជិត	កុំយកធ្វើមិត្ត	ភ្លាត់ខ្លួនអន្តរាយ
បើប្រពន្ធកូន	បងប្អូនចៅហ្វាយ	អាពុកឬម្តាយ
	ឳនកាយប្រតិបត្ត ។
អ្នកកុំមើលងាយ	ឃើញគេរីករាយ	ព្រួយខ្លួនប្រយ័ត្ន
ត្រកូលញាតិផៅ	កូនចៅមហាក្សត្រ	ស្មើថ្លើមប្រម៉ាត់
	ប្រមាថមិនបាន ។
ទោះអ្នកដទៃ	អ្នកព្រៀនអ្នកព្រៃ	ដែលលោករាប់អាន
កុំថាតែមនុស្ស	ទោះសត្វតិរច្ឆាន	ឯងស្អប់ប៉ុន្នាន
	កុំហ៊ានប្រមាថ ។
របស់ឬទ្រព្យ	ដែលចារសំអប់	កុំបាច់សំអាត
ទ្រព្យណាសំឡាញ់	អស់អញឱហាត	ចូរចៅសង្វាត
	ជួយថែរក្សា ។
កុំជិះកុំជាន់	ស្មៅផ្ទីអាចម៍មាន់	ពាក្យចាស់ឧបមា
បុរាណហៅផ្ទី	ពីរបីប្រការ	កុំស៊ីត្រង់ណា
	ជុះដាក់ត្រង់ហ្នឹង ។
សាច់សារលោហិត	កុំផ្តួលផ្តេកពិត	ផ្តួលទោសកើតប្តឹង
អាពុកផ្តែផ្តាំ	ចូរចាំចេះថ្លឹង	សាច់ថ្លើមសួតឆ្អឹង
	និងស្បែកខាងក្រៅ ។
សាច់សួតក្នុងខ្លួន	ទុកស្មើបងប្អូន	ប្រពន្ធកូនចៅ
សរសៃនិងស្បែក	ចែកញាតិជាផៅ	ខ្ញុំស្រីខាងក្រៅ
	ជាស្មៅអាចម៍មាន់ ។
ស្រីខ្ញុំកំដរ	បើឃើញរូបល្អ	កុំលលូកលាន់
កុំលួចលបលេង	ក្រែងម្ចាស់គេទាន់	កុំភប់កុំភាន់
	អាប់អន់អាត្មា ។
បើអ្នកមានយស	មានសក្តិខ្ពង់ខ្ពស់	គាប់នឹងរាជការ
ធ្វើធំធ្វើថី	មន្ត្រីមានត្រា	ព្រះហ្លួងឧកញ៉ា
	សាលាកុង្សីយ៍ ។
ចេះច្បាប់បារាំង	កុំភ្លេចសច្ចំ	កត្តញ្ញូខន្តី
កុំឆ្មើងហួសមាឌ	ភ្លេចញាតិប្រុសស្រី	ជុំនុំកាត់ក្តី
	យកឧបេក្ខា ។
កុំកាន់សីហលោ	កុំកាន់លោភោ	ទោសោមោហោ
កុំជក់អាភៀន	កុំឃ្លានផឹកស្រា	កុំស្អប់ខាងណា
	សច្ចាយកត្រង់ ។
លួងលោមពិសោធន៍	កុំឆបញ្ឆោត	បញ្ចូលឲ្យបង់
ឲ្យបែកឲ្យបាក់	ពាក្យសត្យពាក្យសង្ឈ	កូនអើយផ្ចិតផ្ចង់
	តម្រង់ស្មារតី ។
កុំភើ្លនភ្លេចប្រាក់	កុំភ្លើភ្លាត់សក្តិ	ធ្លាក់ទៅអវិចី
កាន់ធម៌ទសពិធ	រឹតឡើងរាសី	គាប់ពីលោកិយ
	ដល់បរលោកនាយ ។
អ្នកក្តីជាភ្លើង	កុំកាត់កាន់ជើង	អ្នកម្ខាងមើលងាយ
ចៅក្រមជាទឹក	រំឭករំលាយ	កុំជេរកុំវាយ
	បង្ខំនាំខុស ។
ចោរខូចលួចប្លន់	រីចោរស្ម័គ្រស្មន់	តណ្ហាប្រុសស្រី
កុំស្អប់ខាងណេះ	បញ្ឆេះខាងណោះ	លួងលោមបញ្ចុះ
	បញ្ចូលចិត្តក្តី ។
កុំដុតឲ្យក្តៅ	បើឃើញគ្នាខ្លៅ	ប្រាជ្ញាគ្នាខ្លី
កុំឃ្លានប្រាក់ប្រុស	បន្តុះខាងស្រី	បើកាន់ច្បាប់ថ្មី
	កុំចោលច្បាប់ចាស់ ។
កុំដៀលអ្នកស្រែ	ត្រកូលឯងខ្មែរ	កុំប្រែក្រឡាស់
ក្រឡេកឃើញគុណ	ទន់ខ្លួនសំពះ	កុំធ្វើអ្នកណាស់
	កុំត្មះអ្នកក្រ ។
អ្នកកុំភ្លេចគុណ	គ្រូលេខនព្វន្ត	គ្រូសូត្រអក្សរ
កុំចាប់ដៃទាញ	គំនាប់ងក់ក	កុំជជែកត
	ស្មើមិត្តសំឡាញ់ ។
រាស្រ្តរត់ចូលជ្រក	សួរសាកទៅមក	កុំអើឯងអញ
ពាក្យពុំពីរោះ	គេកើតមួក្នាញ់	គេដៀលផ្ចាលផ្ចាញ់
	អន្តរាយកេរ្តិ៍ ។
កុំឆ្មើងអាងបុណ្យ	ស្រដីឲ្យទន់	ពោលពាក្យពីរោះ
ខ្លួនអ្នកនឹងថ្កើង	នឹងឡើងសក្តិយស	កុំឆ្លៀតនាំឈ្លោះ
	ញុះញង់អ្នកធំ ។
កុំស្អប់អ្នកតូច	បើឃើញគ្នាខូច	គួរគិតប្រមុំ
ទោសគ្នាតិចតួច	ផ្តួចឡើងជាធំ	ផ្សែងពូតជាដុំ
	ផ្លុំឆេះជាភ្លើង ។
កុំភ្លើនភ្លេចខ្លួន	ចេះសាសន៍ចិនយួន	កុំចោលខ្មែរយើង
កុំធ្វើក្រអឺត	កុំពើតកុំពើង	កុំពាក់ស្បែកជើង
	ចូលវត្តលោកសង្ឃ ។
ដោះមួកដាក់ឆ័ត្រ	ឱនកាយប្រតិបត្តិ	លំអុតឱនអង្គ
កុំស៊ីតាមឃ្លាន	កុំហ៊ានតាមចង់	កាន់ច្បាប់ស្រុកហ្រ្វង្ស៍
	កុំបង់សាសនា ។
កុំចង់ថ្កើងពេក	កុំលើកដំណេក	ហួសមេហួសបា
តែងខ្លួនឲ្យល្មម	មើលពូជពង្សា	សង្ខេបនិដិ្ធតា
	រឿងផ្គាប់បុណ្យសក្តិ ។
បើទៅជារាស្ត្រ	ប្រាជ្ញាវៃឈ្លាស	គូរវាសឆ្លកឆ្លាក់
ឲ្យឆ្លៀតរែកពុន	បើធ្ងន់សុំដាក់	ខំរកមាសប្រាក់
	ឲ្យគ្រាន់ទាន់ចាយ ។
រាជ្យបារាំងសែស	កូនកុំប្រហែស	កុំថ្នមរូបកាយ
ដើរគិតដេកគិត	ជួញជិតជួញឆ្ងាយ	បើចង់សប្បាយ
	ស្រេចនៅមានទ្រព្យ ។
រាជ្យហ្លួងពីមុន	រកស៊ីរែកពុន	មានក្រតាមភ័ព្វ
រាជ្យលោកឥឡូវ	ត្រូវខំឲ្យញាប់	តែខ្ជិលច្រើនជាប់
	ខ្នោះជើងខ្នោះដៃ ។
តាំងពីឆ្នាំច	ចាំជាដំណ	ទំនិញឡើងថ្លៃ
ចងក្បិនឲ្យតឹង	ប្រឹងកុំសំចៃ	សញ្ជឹងយប់ថ្ងៃ
	កុំឲ្យក្រខ្សត់ ។
បើចង់ស្រាលខ្លួន	រៀនសូត្រឲ្យមួន	ឲ្យមាំឲ្យស្ទាត់
កុំចេះស្ទាក់ស្ទើរ	ល្ងីល្ងើឥតបទ	បើចេះប្រាកដ
	ប្រាក់រត់តាមហៅ ។
កុំថ្នមកម្លាំង	កាប់ជីកចូកចាំង	កុំថារងាក្តៅ
រៀនអ្វីឲ្យឆ្អិន	កុំឲ្យខ្លោចឆៅ	កុំដេកតែខ្លៅ
	ក្រក្រៅសណ្តាប់ ។
បើល្ងង់ឲ្យចេះ	រករៀនតម្រិះ	រិះរកតម្រាប់
ឥន្ទ្រីយឆ្វេងស្តាំ	កុំចាំគេប្រាប់	រៀនស្តីរៀនស្តាប់
	រៀនមើលឲ្យស្តែង ។
កើតមកជាមនុស្ស	ទាំងស្រីទាំងប្រុស	មិនដែលចេះឯង
បើក្រឲ្យមាន	វិញ្ញាណចេះក្រែង	គិតគ្រប់កន្លែង
	កុំដេកតែក្រ ។
កុំប្លន់កុំលួច	កុំខ្ជិលកុំខូច	កុហកឆូវឆ
បោកប្រាសយកប្រាក់	ច្រវាកុំជាប់ក	កាន់មារយាទល្អ
	សុចរិតត្រឹមត្រូវ ។
កូនអើយរកស៊ី	កកាយធរណី	ធ្វើស្រែយកស្រូវ
កុំតាមអ្នកណា	បាតាមតែឪ	លើកភ្លឺជិតផ្លូវ
	កុំស្រាស់បន្លា ។
គេដើរយប់ថ្ងៃ	មុតជើងមុតដៃ	ដឹងចៀសទៅណា
ចៀសចុះជាន់ស្រូវ	ហើយជេរផ្តាសា	កូនម្តាយអាណា
	ស្រាស់ដើរមិនរួច ។
កុំយកគល់ឈើ	ទៅដាក់ពីលើ	ទោះធំទោះតូច
ជំពប់ជើងគេ	គេថាឯងខូច	ជេរដៀលដល់ពូជ
	ប្រដូចមេបា ។
...	នៅមានត..	...
...	...	...
	... ។
ធ្វើរាស្រ្តរកស៊ី	ចិញ្ចឹមគោញី	ថែទាំព្យាបាល
ក្រហេតុពីខ្ជិល	មានដិ្បតឧស្សាហ៍	អ្នកមានប្រាជ្ញា
	មិនស្មើគំនិត ។